Ishq Unlimited  (Paperback, Ashfaq Ahmad)

‘Ishq Unlimited’ ek aisa kahani sangreh hai, jo romance me doobi das kahaniyon ko apne aap me samete hai. Kuchh kahaniyan mukammal huye Ishq ki dastan kahti hain, to kuchh aisi hain jo adhoori reh gayi muhabbat ke sath mann me ek kasak chhod jaati hain. Pahli kahani ‘Ishq Dobara’ bichhadne ke baais saal bad ek shaadi me waapas takraye ek couple ki kahani hai, jo us ittefaq par apna ateet yaad karte usi daur me jeene lagte hain. Doosri kahani ‘Sanyya Be-iman’ premika dwara chhode gaye aise yuwak ki kahani hai, jo khud ko saabit karne ke liye galat raasta akhtiyar kar leta hai aur us path par har ladki uske liye shikar ho jati hai. Is sangreh ki teesri kahani hai ‘Saat din ka Ishq’, jo bataati hai ki sapne dekhne waale premiyon ka jab vipreet sachchai se saamna hota hai to kaise unka pyaar hawa ho jata hai aur we alag raaston par aage badh jaate hain. Chauthi kahani ‘Prem me padi Ladki’ Mobile game ke sahare ek ladke ke chakkar me pad gai ladki ki kahani hai jo apne premi ke paas pahunchne ke liye ghar se bhag nikalti hai, lekin us tak pahunchne se pahle hi uski zindgi me ek alag raaste ki gunjaish ban jaati hai. Panchwi kahani hai ‘Wo Pahla sa Ishq’, jo aise yuwak ki kahani hai jise kachchi umr se hi ek ladki se pyar ho jata hai aur ittefaq se paanch saal baad wo usse ek aise safar pe takra jati hai, jahan kharab halat ke chalte dono ko ek hi jagah rukna padta hai. Chhathi kahani ‘Tum wo to Nahi’ us sahity premi yuwak ki dastan hai, jise ek khas lamhe me ek ladki se pyar ho jata hai aur use paane ke liye wo naitik-anaitik sabhi raaste akhtiyar karta hai, lekin jab hasil kar paata hai tab pata chalta hai ki wo lamha hi ek bhram tha, jiske bharose uska ishq tika hua tha. Is kahani sngreh ki saatwin kahani ‘Likhe jo khat tujhe’ us Pen lover ki kahani hai jo ek lekhak ke Shabdon ke sahare hi use dil de baithti hai aur har hafte use ek chitthi likhti hai, lekin akhirkar use ye bhaan hota hai ki wo ek bhram me thi. Aathwin kahani ‘Kasak’ bichhad gaye us ishq ka fasana hai jahan jativaad se jakde samaj me mil pana mumkin hi nahi tha, lekin bichhdne ke bad bhi premi na apni muhabbat bhoolta hai aur na hi apna farz. ‘Bansi wala Ishq’ is sangreh ki Nawin kahani hai jo sirf bansuri ki dhun par bansuri wale ke prem me pad jaane wali ladki ki dastan hai, jo ek baar is ishq me padne ke bad phir us ishq se ubar hi nahi paati. ‘Online Ishq’ sirf social media ke sahare panpi wo prem kahani hai jahan ek mod par bhram ka shikar ho kar ladka alag raasta pakad leta hai magar ladki wahin tiki reh jati hai aur khatm ho jati hai.