Arpan (ek vaigyanik mahila ki likhi kuchh kavitaon ka sangrah) / अर्पण  (Hindi, Paperback, Dr. Vijaya Sinha)

Dr. Vijaya Sinha ka kabya sangrah ’Arpan’ kai kono se chaokanewali pustak hai. Ek to vigyan ki is prakhar sadhika ke tejaswi vaicharik dharatal ke unki mridul bhavnaon se bhingne ki mithi mahak nihsrit hoti hai, dusari ore unki bhavanao ki Bhagirathi Hindi se Bhojpuri hote hue angreji tak me apni bahurangi kalaon me lahrati dikhti hain. KavyItri ne apane jivan angan ke anubhaon ko sahejker jivan tatya ke prati apni maulik drishti ko apni kavitaon me ghor diya hai. Aasha ki lataon ne mano unke jivan vrikchha ko chaturdik lappet rakha hai. ‘Rangmanch’ kavita me mano kavyitri ne apne dwara anubhoot jivan darshan ko hi sakchhat paros diya hai. Vigyan ki jatil guthiyon ko suljhanewali vaigyanik kavyitri Vijaya ji eeshwar ke anusandhan ke anant path par ek anthak pathik ki bhanti vidhi ke rahasyon ke sath luka chhipi khelti najar aa rahi hain. Vijayaji ki kavya yatra ek bhav pravan anusandhansheel prani ka shodhpurn aur satark drishti path hai, jo pathakon ko ander tak paith jane ki chhamta se paripurn hai. Unki bhasha me saralta ke saath shath vyapakta bhi hai tatha Bhojpuri se lekar angreji tak ke unke swabhawik sarokar ka sakhchhatkar bhi hai. Unki rachnaon me vigyan ka vaichrik shushk saikat bhavnaon ki hridayharini hahrati dhara se santript hokar unki vaani me phoot padta hai – ‘Bhool gai hun ab sai Physics, Kavita ne pakad liya hai haath’. Mai inki is rachna yatra ki nirantarta ke prati apni shubhkamnayen prakat karta hun. …Vishwamohan