Koi Aisa Mausam Jee Loo'n / कोई ऐसा मौसम जी लूँ  (Hindi, Paperback, Meena Sood)

Meena Sood apne kavy sangrah KOI AISA MAUSAM JEE LOON ke saath apne paathakon ke samaksh hain. Is sangarh ki kavitaon ki bhaav bhoomi kahin prem hai toh kahin rishte. Kahin shraddhanjali swaroop kuchh shabd pushp hain toh kahin mausam ki chuhal. Kahin kavyitri ne prakritik chhata ke prateekon ko apni rachnaon ke bimb ke roop me prastut kar kavitaon ko gehrayi pradaan ki hai toh kahin wo apne paltoo se bhi laad ladaati hain. sangrah me kuchh chhoti rachnayen hain toh kuchh badi. kuchh kavitaon me naya kalevar hai. kuchh kavitayen geet ki saranchna me toh kuchh chhandmukt hain. Har rachna pathak ko rumaniyat, ruhaniyat aur bhavnaatmakta ke saath jode chali jaati hai. kuchh doosre prateek bhi mohak chitr kheenchte hain jinmen mausam, phool, hawa, baarish, boonden, saawan, dharti pramukh hain. Prakriti ka har roop inki kalam se vistaar paata hai. kavyitri ne apne is sangrah me bhaavon ke bahut se mausam jiye hain, kuchh achchhe, kuchh meethe, kuchchh tees bhare. Yahi bhaav inki kavitaon me pratibimb bankar ubharte hain aur jan maanas tak pahunchte hain. Adhiktar kavitaayen samvedna ki dagar per kheenchkar le jaati hain. Rachnaon ki sahajta, saralta va gehre bhaavon ke saath kehan shaily is sangrah ki khoobsoorati badhati hai. Inke pehle prakashit do kavy sangrah Kriti Meri Abhivyakti va Aakhar Dil Ke bhi pathakon dwara sarahna pa chuke hain.